Kuresh Olmeydu

In memoriam of Kurash Kusen Kuresh Sultan Kurash Kosen Uyghur Uighur East Turkistan

Eshu Chagh

Kim idim dep özümdin soriyalisam,
Ejdatlirim qilghanni doriyalisam,
Shéhitlerning qénini puriyalisam,
Erkin hayat eshu chagh külidu manga.

El – wetenning derdini men chékelisem,
Dertmenlerning derdige men yitelisem,
Qan’gha qan hem jan’gha jan men birelisem,
Erkin hayat eshu chagh külidu manga.

Yashash digen uqumni men bilelisem,
Chin yürektin urghutup men külelisem,
Dostqa dost bop düshmen’ge musht türelisem,
Erkin hayat eshu chagh külidu manga.

Erkek digen bu sözni men oylap körsem,
Qanchilik dep özemni hem boylap körsem,
Hayatimni yéngidin toylap körsem,
Erkin hayat eshu chagh külidu manga.

Dixan bolsam étizdin hazirla yansam,
Ketminimning ornigha qoralni alsam,
Qulluqni hem yoqatsam ,kishenler chaqsam,
Erkin hayat eshu chagh külidu manga.

Qelimimdin weten dep misra tökülse,
Dildin – tildin tökülse dastan pütülse,
Alqishlansa dostlirim, düshmen sökülse,
Erkin hayat’eshu chagh külidu manga.

Mallirimni weten dep men satalisam,
Hultash bolup shu yolda men yatalisam,
Weten üchün hessemni men qatalisam,
Erkin hayat eshu chagh külidu manga.

Siniplarda weten dep sözliyelisem,
Ewlatlargha kélichek közliyelisem,
El – weten dep burchumni izliyelisem,
Erkin hayat eshu chagh külidu manga.

Heq musulman ikenmen iman satmisam,
Weten bolmay jennette tengsiz yatmisam,
Dualarda men dimey , biz dep yadlisam,
Erkin hayat eshu chagh külidu manga.

Munqerz tursa wetinim hejge ketmisem,
Töt balamni ach qoyup nezir etmisem,
Selle orap ton kiyip mese sepmisem,
Erkin hayat eshu chagh külidu manga.

Bilim ehli alimlar hörmet qilinsa,
Aqillardin meslihet sorap élinsa,
Irpan bilen hemme ish yolgha sélinsa,
Erkin hayat eshu chagh külidu manga.

Eqil bilen ishlisem qilghan ishimni,
Özem yisem halaldin tapqan éshimni,
Sürtiwetsem elemdin aqqan yéshimni,
Erkin hayat eshu chagh külidu manga.

Sen nelik hem men nelik emdi dimisen,
Sebdishimning béshini emdi yimisem,
Düshmenlerning gépige emdi kirmisem,
Erkin hayat eshu chagh külidu manga.

Bergen wedem – ehdemdin mutleq yanmisam,
Özem qilghan ishimdin qet’i tanmisam,
Yaramsiz bop qatardin chüshüp qalmisam,
Erkin hayat eshu chagh külidu manga.

Ishligenni körelmey anga külmisem,
Emelsiz yoq xiyalni emdi sürmisem,
Gheywet qilip bulungda bikar yürmisem,
Erkin hayat eshu chagh külidu manga.

Ichken sharap kallamni bezlesh qilmisa,
Hesetxorluq baghrimni emdi tilmisa,
Nomus bilsem bashqilar közge ilmisa,
Erkin hayat eshu chagh külidu manga.

Yigen tayaq her zaman estin ketmise,
Qisas saqlay on yillap maghdur yetmise,
Janni tikip chiqaymen imkan etmise,
Erkin hayat eshu chagh külidu manga.

Eski doqmush öylerge qilmisam tawap,
Menmu kitap oqusam satmisam kawap,
Ish tes kelse ejdatttin tapmisam jawap,
Erkin hayat eshu chagh külidu manga.

Birsi chiqsa munberge men chawak chalsam,
Sherep quchqan baturni béshimgha alsam,
Elge töhpe qoshqan’gha sazimni chalsam,
Erkin hayat eshu chagh külidu manga.

Elge nime nep berdim dep oyliyalisam,
Sawap ishni izdep qilip xosh bolalisam,
Her’ishimni el – weten dep men quralisam,
Erkin hayat eshu chagh külidu manga.

Kimla yise maqul dep qoy bop qalmisam,
Külüp qoysa hijiyip men saz chalmisam,
Itqa shir bop hürpüyüp menmu yanmisam,
Erkin hayat eshu chagh külidu manga.

Pehliwan ikenmen qan tökelisem,
Jenglerde qaynamgha men chökelisem,
Düshmenning bélini men pükelisem,
Erkin hayat eshu chagh külidu manga.

Quldek yashap mükchiyip könüp qalmisim,
Bayliqimdin körenglep süren salmisam,
Düshminimni her yerde ursam -chamlisam,
Erkin hayat eshu chagh külidu manga.

Erkinlikke jan tikip men chiqalisam ,
Hörlük .Üchün mesh’elni men yaqalisam,
Shéhitlerge bash qoyup gül taqalisam,
Erkin hayat eshu chagh külidu manga.

1997.7.2. Béshkek

Leave a Reply

You must be logged in to post a comment.